Jørðin er ein av átta gongustjørnum, sum ganga kring Sólina. Sólin og allir knøttirnir, sum eru í ringrás um hana, eru við í sólskipanini.
Tað er tyngdarkraftin, sum heldur gongustjørnum føstum í sólskipanini. Sólin er størst og hevur tí sterkastu atdráttarkraftina av øllum. Hon noyðir gongustjørnurnar at ganga í ringrás um seg.
Sólin og allir knøttirnir, sum eru í ringrás um hana, eru við í sólskipanini. Frá vinstru: Sólin, Merkur, Venus, Jørðin, Mars, Jupiter, Saturn, Uranus og Neptun. MYND: iStockphoto
Allar gongustjørnurnar ganga sama veg um Sólina. Tær mala eisini um seg sjálvar, meðan tær eru á ferð um Sólina. Men ymiskt er, hvussu skjótt tær ferðast. Jupiter hevur næstan 12 jarðarár at ganga um Sólina, og eitt ár á Neptun er sum 165 jarðarár.
Eru ógvuliga ymiskar
Tær fýra innastu gongustjørnurnar (Merkur, Venus, Jørðin og Mars) eru allar úr steinsløgum og metalum og hava skorpu. Tær fýra ytru gongustjørnurnar (Jupiter, Saturn, Uranus og Neptun) eru ovurstórir gassknøttir.
Gongustjørnurnar í sólskipanini eru ógvuliga langt frá hvør aðrari. Á myndini omanfyri eru tær kroystar saman fyri at passa á eina og somu mynd. Tær eru eisini ógvuliga ymiskar í stødd. Jupiter er tann størsta og Merkur tann minsta.
Smástjørnubeltið
Í sólskipanini eru eisini nógvar smástjørnur. Nógvar teirra eru í ringrás um Sólina millum Mars og Jupiter. Hetta økið verður nevnt Smástjørnubeltið.
Smástjørnubeltið. Tann størsta smástjørnan í Smástjørnubeltinum eitur Ceres. Hon er sum Frakland til støddar. MYND: iStockphoto
Kuiper-beltið
Uttan fyri gongustjørnurnar er Kuiper-beltið. Eins og í Smástjørnubeltinum eru nógvar smástjørnur her. Smágongustjørnur eins og Pluto, sum eru ov smáar at roknast fyri veruligar gongustjørnur, eru eisini at finna her.